最新消息

铁皮屋拍戏 惨吹热冷气 蔡瀚亿40度扮吕奇险中暑

2019-01-14
上世紀黑白粵片年代,玉面小生呂奇創造出獨一無二的奇哥風格,成為當年萬千少男少女偶像;至 1997 年電視版出現《難兄難弟》的「李奇」羅嘉良,這位 1.0 的「奇哥」亦成為經典,嘉良更憑此角色首奪視帝。2019 年,今次到蔡瀚億 ( BabyJohn ) 上陣,他在參演的 60 年代背景懷舊劇《荷里活有個大老千》扮演「舒奇」,並於明晚 ( 1月15日 )  正式出場,2.0 的奇哥有笑有淚,仲又鹹又臭!
 
蔡瀚億今次除了參考六十年代的懷舊片外,亦有參考羅嘉良神作《難兄難弟》,事關當年嘉良的極致演出已啤入腦印象難忘,但蔡瀚億亦加入不少新元素,其戲中角色其實係講述他自幼與吳業坤 ( 坤哥 ) 齊被老千鄭則士收養,但鄭因一次意外而轉撈製片人, 蔡瀚億順利成章變成演員,每次拍戲例必呂奇上身,離開影廠就回復爛賭本性,不過隨着劇情發展角色會由喜轉悲, 蔡瀚億說:「呢部戲有好多搞笑位好攞膽,頭段有好多生活上嘅搞笑情節,去到中段就多淒涼位,基本上愈拍愈慘,所以中段我每次去到片場,情緒都好波動大上大落。我個角色係鍾意賭,但冇因為呢次拍戲而去學,因為角色有名你叫─『舒奇』,唔輸就奇,學咗有機會贏,唔學就一定輸,keep 住輸就得啦。」
 
扮「舒奇」必有笑點,但鏡頭後, 蔡瀚億在內地拍《荷》劇時,日日鹹魚生曬,由底濕上面變乾再濕再乾,又鹹又臭又黐立立,真係好難頂,「我哋喺一個 38 至 40 度底下嘅鐵皮廠拍攝,太陽曬落鐵皮嘅熱力直接射入室內,每次我一落車一入片場化妝間嗰吓已經熱到底褲都濕埋;我有個造型係着三件頭,有次去室外拍嘢,真係好熱,得一把大排檔風扇,我就坐埋去,瞇埋眼自我催眠,話俾自己聽唔熱、凍架,但工作人員見我唔郁以為我中暑,係咁攞水俾我。嗰種熱嘅狀況,其實係令人感覺喺中暑邊緣。」
 
以為返酒店開大冷氣可以嘆吓,結果冷氣同樣熱到暈, 蔡瀚億說:「酒店個冷氣機好奇怪,裝喺窗邊,冷氣係吹落個窗度,但太陽直射個窗,結果間房都好似冇冷氣,而個冷氣機到咁上下就滴水,係滴到好似瀑布咁,好多呢啲情況係我見都未見過。」