羅力威水上宴迎長輩 雨僑撈亂鮑魚喊爆

羅力威和雨僑日前 (3月31日) 舉行婚禮，兩人中午在淺水灣進行註冊儀式，並與親友、同事、同學及圈中友好等共進西式午餐後，晚上則到珍寶海鮮舫筵開十六席，宴請雙方家人、至親及長輩，全日兩餐婚宴有中有西，有新派又有傳統，實在非常細心。

由於一對新人在婚禮前沒有接新娘等儀式，所以晚宴雖一切從簡，但二人亦有向雙方家長及長輩斟茶，進行簡單的傳統習俗。簡約熱鬧的家族晚宴，令兩方長輩很滿意，但原來所有婚禮晚宴事宜，由羅力威一手包辦，難怪雨僑不停讚老公叻仔。

阿僑說：「我覺得好老公好叻，噚日由場地咁精彩嘅佈置到 rundown，到所有每一個細節、車嘅安排、seating plan 全部係我老公做晒，我真係個人到就得，所以我係瞓得最好，反而我老公瞓唔着，一早就安排車物資去現場。我係好開心嘅，見到好多圈中朋友，陳嘉桓搶到花球，Dominic (何浩文) 又做兄弟，同埋我件婚紗成40磅重，Kev （婚紗設計師）真係日以繼夜做件婚紗俾我，我好感謝佢。」

昨日天公造美，羅力威和雨僑下午在婚宴戶外草地曬到變燒豬，皮膚都變成兩截色，緊接又頻撲去晚宴，不過一切都係幸福同快樂，最搞笑係經過婚禮之後，雨僑終可在阿威面前證實到她的「身份」，她笑說：「我同我老公一路都有個笑話，就係大家對對方嘅過去都成疑，我哋識嘅時候都廿幾歲，佢成日話你係咪真係有讀大學架？唔見你啲同學嘅？你係咪籃球隊架？咩合唱團全部都唔見有、又冇相，到噚日啲舊同學嚟晒，我就可以證實到我身份啦，佢唔係娶到個特務，但我對於我老公嘅身世仲係成謎，因為佢嘅長大喺新西蘭，我仲係冇見過佢任何一個同學同老師。」