最新消息

開騷前感冒 鄧健泓兩個月瘦20磅

2018-04-27
鄧健泓 ( Patrick ) 後日 (29/4) 將於旺角麥花臣場館舉行《阿泓 鄧健泓 Music Live Concert 2018》,近期他與樂隊已密密排練,但因為之前健身加上工作密集,日前更不慎患上感冒,令到已經瘦了一圈的他更瘦,現時其體重僅得 125 磅。
 
Patrick 大半年前約有 153 磅體重,其後他做運動回落十磅;到今年 2 月宣佈開騷後,他積極健身及注意飲食,Patrick 自己未有為意,反而身邊朋友都指他瘦了好多,Patrick 說:「依家每一個人見到我都話我瘦咗好多,有啲朋友仲擔心我健康,但放心,我做完演唱會食多啲谷肥番自己,如果唔肥我會驗身,我依家應該 125 磅度;但無論點,show must go on,嗰日會盡我最大努力去完成個騷,希望大家俾多啲支持我,enjoy 個騷。」
 
開騷前夕,Patrick 亦難免心情緊張,主要原因是他開始病,「Sukie ( 石詠莉 ) 有啲傷風,我有少少被傳染,呢幾日我有食維他命C,盡量抑壓擴散,希望成功啦,所以心情比之前緊張咗啲啲,始終我準備咗咁耐,一直冇病冇痛,所以突然間有少少影響係會有啲擔心。」
 
後日 Patrick 的個唱會分成幾個不同部份,每個部份各有主題,Patrick 希望觀眾看過後能對他更了解。至於嘉賓方面,包括有台前幕後的好友,Patrick表示:「嘉賓有方力申、Sukie,仲有 Joey Tang ( 鄧建明 ),我好多謝佢哋。特別係Joey Tang,喺我好徬徨搵唔到結他手時,佢抽時間嚟幫我完成呢個騷,佢好仗義話有咩我幫你啦,真係好多謝佢。」