最新消息

Hailey透視bra再中波膽 王宗堯:佢殺出嗰兩球好勁

2018-07-11
全球盛事世界盃已去到四強賽,今日凌晨 ( 7月11日 ) 法國和比利時兩隊超級勁旅大戰,結果法國以 1:0 勝出,成功打入決賽。足球發燒友王宗堯 ( Greg ) 今凌晨現身屯門市中心,出席 viu TV《全民睇波》節目,其他出席藝人尚有陳俞希 ( Hailey )、林曉峰、強尼、林耀聲及陳炳銓等,Dear Jane 和天堂鳥則擔任演唱嘉賓,Greg 在現場更玩遊戲,分別笠上一對巨靴扮大腳八踢波,又戴大手套赤腳企石春路做龍門。
 
近日成為網民熱話的 Hailey,今明兩日四強賽及決賽都會繼續擔任 viu TV 講波主持,由於之前她每於半場休息,在恤衫內穿上支持球隊的國旗比堅尼講波,眼利網民見到她次次都估中邊隊贏波,甚至中埋波膽,所以她在一到屯門就成為 Greg 和現場人員的話題;更犀飛利嘅係 Hailey 賽前着紅衣去屯門出席活動疑撐比利時,緊接即撲去柴灣 viu TV,在直播球賽的半場出鏡,而她在柴灣錄影廠內換上白恤衫,內裏穿的是法國三色國旗比堅尼,結果她再一次「透視」成功,燈死比利時。
 
Hailey 直言本身睇好法國,只係諗唔到着比堅尼玩「身在曹營心在漢」,次次都貼中,所以 Greg 笑她今年做低晒其他世界妹,Hailey 笑說:「我冇諗過網民反應咁大,係無心插柳。我着咗四場泳衣,着親嗰場都貼中,每次公司 designer 都有問我想要邊隊,就做邊一隊嘅泳衣,所以今晚同決賽嗰場,透視裝都係必着。」
 
Greg 就猛讚 Hailey 勁:「依家世界盃風頭點夠 Hailey 嚟?使出佢嘅透視裝同殺出佢嗰兩球,好多巴打絲打都俾佢馴服做裙下之臣,真係好勁,但開心嘅,佢口齒伶俐,做主持做演員再做埋連登女神真係搞佢唔掂,運嚟到就擋都擋唔住。」至於今凌晨法國對比利時一役,Greg 睇完波後依然肉緊,「冇諗過對住法國,比利時打唔出水準,法國係有冠軍相,比利時打到臨尾成隊散晒冇晒力,法國就整體成個戰術同陣營真係打得好好,法國晉級,英格蘭有危機,但依家唔諗啦,過埋今晚克羅地亞嗰關先啦。」