鄧健泓暫擱婚禮 石詠莉10月處女開騷

Hi-fi小天后石詠莉 (Sukie) 昨晚和男友鄧健泓 (Patrick) 齊齊透過 facebook 公佈「喜訊」，就係....唔係結婚，而係宣佈入行9年來首次舉行個人演唱會「Sukie S My First Stage Live 2016」，個唱將於 10月9日 假九展 Starhall 開鑼，本周四(28日)在 hkticketing 開始公開發售。

Sukie 憑去年推出的首張 Hi-Fi碟《聽聽 Sukie's 》，勇奪「IFPI香港唱片銷量大獎2015頒獎典禮」十大銷量廣東唱片及躋身十大銷量本地歌手兩大獎項，由於反應奇佳，隨即籌備今年推出第二張大碟，但因緣際會，湊巧九展Star Hall有期，Sukie 決定處女開騷，並於開騷當日推出三千隻限量特別版新碟，讓入場觀眾優先購買。

首次開個人演唱會的 Sukie 當然緊張又興奮，近期她已秘密練兵，努力減肥、keep fit、練氣，她笑說：「而家每晚我都做好多帶氧、伸展同埋體能運動，務求最佳狀態示人，我最有恆心係節食，放棄晒薯片、甜品、澱粉質，所有好食嘅嘢都戒緊，恆心高達90%，仲有10%忍唔住口，咁就做運動 burn咗去。」

至於繼續擔任 Sukie 新碟製作人及籌辦今次個唱的 Patrick，就承認面對重大挑戰及重重難關，不過他勇於接受，要乘風破浪大步走。之前 Patrick 提過完成 Sukie 第二張唱片後便搞婚禮，但因為扑鎚開騷，結婚唯有順延，他說：「既然緣份安排殺出個程咬金，截咗我第二個人生大事嘅糊，呢個程咬金變成我人生嘅第二件大事，完咗呢個演唱會、忙埋我嘅兩個舞台劇後，會重整一下我哋嘅資產，之後會落實安排婚事，都會係下年嘅事。」