《導火》12優先場大滿貫 宗堯家怡明首映硬撼妮妲

今個暑假唯一本土電影《導火新聞線》將於本周四 (4日) 隆重獻映，明日 (2日) 更會在銅鑼灣舉行盛大首映禮，雖然被譽為今年最強颱風的妮妲會在今晚迫近香港，甚至有網友估計打風程度「座八望十」，不過《導》片男、女主角王宗堯 (Greg) 和周家怡就堅持硬撼妮妲，決在風雨下出席首映禮，Greg 更笑言屋企有充足防雨裝束，冇有怕！

前日周末及昨日周日，《導》片舉行優先場，一眾演員及主創包括 Greg、家怡、楊淇、導演方俊華及監製兼編審潘漫紅，跑勻港九新界十間不同戲院率先進行謝票，即使昨晚天文台已掛一號波，團隊依舊出動，而期間更巧遇入場睇《導火》的方健儀。

之前《導火》演員曾在嘉禾荃新天地出席優先特別場及座談會招待大專生；又現身記協場，與過百位真正新聞從業員交流，再加上過去兩日謝票場次，這合共12場的優先場最難得的是口碑大滿貫，令《導火》團隊打了一枝強心針。

對於觀眾的熱情，Greg全部收到，他說：「其實我都有一排冇謝票，今次呢套戲喺未拍前，大家都好緊張內容，包括同香港嘅緊扣性，觀眾、記者或者大專生睇嘅反應；呢幾日《導火》嘅優先場次唔係特別多，但戲院好有信心加多幾場嘅時候，我哋睇到入場觀眾嘅反應都係非常感動，而且大家好鍾意。最好嘅係喺戲後段我哋俾到一啲希望香港人，希望借呢部戲俾到香港人正面訊息，同埋令到香港可以喺更多嘅難關中繼續行到出嚟。」

首次孭飛做女主角的家怡對新片口碑票房當然關注，她笑說：「係好開心見到咁多人支持，同埋全部都係好嘅評語，聽到觀眾俾嘅鼓勵都會希望我哋繼續拍落去，話會推介俾朋友睇，支持香港電影，我覺得好感動；同埋當我每次睇到出謝幕roller嘅時候，睇到幕後好多人名就會好感動，拍一個戲係要好多人促成，見到觀眾又鍾意，我係超級開心。」