嘆 $1和牛漢堡 鄭融番娘家爭食 莊思敏嗌抵到喊

今日銅鑼灣hmv Bar & Restaurant推出超級無敵大優惠，花費一蚊雞就可以嘆到原價$158的澳洲和牛漢堡餐配薯條，所以現場大排長龍，吸引數百食客排長龍爭相幫襯。莊思敏(Jacquelin) 和鄭融亦應邀到餐廳試食，Jacquelin更大讚：「簡直抵到喊，一蚊食得飽，當然係好食，和牛漢堡冇因為平偷工減料，依然好大份，個薯條又好食，最鍾意係個沙律醬，大家食得好開心，覺得個餐做得好好，同埋價錢係非常之抵。」
鄭融 ( Stephanie )近期回歸Starz People娘家，感覺有如返屋企一樣：「我相信緣份，覺得同Starz People嘅同事合作係最自然、最有默契，咁啱自己要揀新公司嘅時候，就揀番屋企，因為咁多年同老闆(鄒世龍)繼續keep住分享，好同困難時都會話俾佢知，就算唔同一間公司都係屋企人，我兜咗一個圈再返去，都好期待大家合作嘅火花同動力。」
Stephanie今日都有帶媽咪一齊試食，她大讚和牛漢堡好味又夠juicy，而且因為食肆每日有時段及50個名額限制，笑言爭到食和牛漢堡都幾有成功感，「幾刺激架，因為名額有限，邊個爭到有成功感，食到一蚊burger都幾好玩。」