坐時光機溝靚女 王宗堯扮阿飛跳老舞

男神王宗堯 (Greg)近日除宣傳8月4日主演新片《導火新聞線》曝光不絕外，其出任代言人的「7UP」全新廣告《阿飛外傳》預告片 (https://www.facebook.com/7uphk/videos/1067957533240550/) 亦於昨晚出籠，而完整廣告片則在今晚推出。
預告片中，Greg重現「阿飛」風采，在懷舊場景下着住白背心對鏡gel頭，片尾對白「你俾一分鐘我」，當然令人聯想經典電影《阿飛正傳》內扮「旭仔」的哥哥張國榮同飾演阿珍的張曼玉所講的「一分鐘」金句。至於今晚出街的完整廣告片，更有Greg和扮「阿珍」的靚女坐時光機重返60年代，一齊bom cha cha跳老舞，大家身水身汗之際，最好有得「溝」兼「溝得埋」─即喻意透過一段浪漫關係帶出能百搭調配的7UP。
今次Greg在屯門一間荒廢小學進行拍攝，由天光拍到半夜，加上天氣又熱，實在拍得勁金，但他依然好開心：「因為係同一個好夾同好玩嘅團隊合作，由最初搵reference影相到度concept，王家衛、哥哥、『旭仔』同埋一分鐘約會，呢啲都係大家好鍾意嘅嘢。嗰日我哋喺荒廢小學拍，嗰度拉唔到電，工作人員好好，仲特登整咗間休息室，雖然當日好熱，又拍咗好耐，但知道拍緊嘅嘢唔係hea、唔係揼波鐘，反而好似拍戲咁，慢工出細貨，睇呢條預告片已經好開心，好期待。」
《阿飛正傳》、哥哥都是無敵經典零死角，要重塑經典不無壓力，Greg笑說：「好似跳舞呢個咁經典嘅場面，大家都會回味，拍時有啲壓力，但呈現番嘅對白，變咗今時今日嘅2016年7月7號夜晚7點鐘好特別，不過客戶就話其實冇壓力，哥哥係哥哥，我係我，係想做番新版本嘅阿飛外傳向哥哥致敬。」