最新消息

最霉大佬王宗堯帶隊 駱振偉姦吳嘉熙被拆祠堂

2018-07-17
viu TV 播映世界杯收視爆燈,食住世杯勢頭,隨即於昨晚 ( 7月16日 ) 推出由導演孔令政執導、王宗堯 ( Greg )、吳嘉熙、陳炳銓、駱振偉 ( Thor )、陸駿光、陳啟泰及田啟文等主演之 20 集新劇《PLAN B》,昨晚一眾演員拉大隊去卡拉 ok gathering 睇首播,個個睇到眉飛色舞,更大讚攝影師歐家安有料到,拍得非常有電影感。
 
《PLAN B》其實是講述一個元朗社團的江湖恩怨,故事開展由 Greg 飾演的大佬「乳環」,帶同兩條口靚陳炳銓、駱振偉食大茶飯,綁架有錢女吳嘉熙而引發;但這三人黑幫勁倒霉,Greg 未拎贖款已撞車搞到一頭血,駱振偉更衰,見到吳嘉熙就衰鹹濕想強姦肉蔘,結果反被女方踢「細佬」潑杯麵兼走甩。
 
吳嘉熙就說:「第一集睇所有嘅 shot 都拍得好靚,一部江湖片可以拍得香港咁靚嘅?我覺得每個人出場都好有型,我俾人綁架都好有型,同埋又營造到阿 Thor 係好鹹濕嘅古惑仔,如果我真係個蔘都幾驚。」Thor 亦說:「我個角色係懶醒,第一集出嚟就色心起,又隊嘢,仲俾吳嘉熙兜臉潑杯麵,但佢走甩會係一個伏線,咁加埋策劃係阿 Greg,佢係大佬但又暈咗,之後仲會有好多事情發生。」
 
至於 Greg 亦自嘲係元朗最霉大佬,他笑說:「我係一個小混混策劃呢單綁架,係駱振偉同陳炳銓嘅大佬,喺個社團入面,得兩條口靚就知有幾霉,但後面踩到嘅線好似田老闆 ( 田啟文 ) 嘅阿公同陳啟泰嘅黎根,佢哋出嚟之後會令『乳環』好大起落。我覺得今次最好玩係全部元朗實地拍攝,所有航拍同埋鏡頭位都好有電影感,片頭片尾好花心機拍,我哋出機又有、幫手拍又有,成個製作團隊係好細心。」