最新消息
黑膠被炒高10倍 石詠莉突擊MK唱片舖
2016-11-07
早前舉行首個個人演唱會的石詠莉（Sukie），近日忙於宣傳第二張大碟《Welcome 2 My Destination》，日前她在男友鄧健泓陪同下殺落旺角「巡舖」，第一站先去位於女人街的唱片店簽海報簽CD，期間她發現自己的首張黑膠大碟由原價$280被炒至$2,800，價錢竟被炒高10倍！
Sukie坦言既開心又無奈：「開心係因為有人重視我嘅作品，得到聽眾嘅認同，覺得張碟有quality、係值咁多錢。無奈係我哋自己製作唱片，每張唱片拆埋發行費、版稅各樣嘢已經賺錢唔多，但係啲炒家一買一賣賺嘅錢，以單碟價嚟講，可能賺得仲多過我哋。」
接着Sukie突襲第二間唱片店，剛好遇上男fans連掃她五張新碟，在場老闆娘還拎手機開live直擊Sukie巡舖，逗得Sukie非常開心。
最後Sukie再去信和橫掃四舖，夠晒賣力，她說：「因為我哋冇乜資金賣廣告，所以要親力親為，行多啲唔同嘅地方。上次第一次出碟嚟行舖，我好戰戰兢兢、有啲怕醜，但佢哋（CD舖老闆）已經好nice，自從上次之後，大家就好似建立咗一個友誼。」各CD舖老闆都表示銷情不錯，更查問大碟會否推出「SACD（Super Audio CD）」版，Sukie說：「其實SACD係一個好重要嘅市場，咁多老闆問，因為一出，一定會再賣多幾千！一賣多幾千，對大家都好。佢比我哋仲要肉緊，所以我都好感恩佢哋咁錫我哋。」
