睹表妹Charlene打《G-1》中拳 雨僑肉赤：比想像中心痛

今年4月，viuTV開台推出重砲真人騷《G-1格鬥會》，為香港史上首個格鬥騷創先河，八位女參賽者浴血八角籠，最終由唐紫睿 (Hazel) 勝出勇奪金腰帶。由於《G-1》收視高迴響大，viuTV食髓之味，再度炮製兩集《G-1格鬥會挑戰賽》，在昨晚播出的首集中，由五歲已習洪拳的何慈恩 (Charlene) 對戰媽咪級的余曉彤 (Hidy)，兩人火併三個回合後，結果Charlene大熱勝出。

任職私人健身教練的Charlene除了是劉家良徒孫外，亦係雨僑 (Ava) 親表妹，兩表姊妹由細玩到大，感情要好。昨晚Ava當然捧場在家睇《G-1》，雖然表妹砌低 Hidy，但擂台上拳腳無眼，見到Charlene中拳，Ava肉都赤，她說：「係比想像中心痛，都知道Hidy係個好強對手，唔會打得輕鬆，但表妹真係發揮得好好。」

香港速度滾軸溜冰代表隊運動員王蘊妮 (MiMi)曾參與首季《G-1》，證明非藝人都可以參賽，但因當時Charlene較忙，所以未有參加，直到今次才出戰，Ava說：「我知呢次佢嘅訓練期唔係好多，但佢有底子，同埋佢好有體育精神，每一場比賽都覺得學到好多嘢，又識咗啲好朋友，都開心呢個賽事令佢成長咗，武術上又學到啲新技術。」

為撐表妹，Ava亦應viuTV之邀拍攝和表妹一齊training的片段，昨晚她在節目內還笑Charlene從小已跳紮紮，「佢好細個嘅時候，人哋去遊樂場，好哋哋sir滑梯、打鞦韆，佢係跳上個架度掉番轉搵隻腳勾住。」Ava作為家人，自然不想表妹的身體及心靈受傷，但只要Charlene覺得適合而又決定去做，她亦會全力支持。