撻生魚舞台劇落幕 王宗堯激瘦15磅剩棚骨

王宗堯 (Greg) 和歐錦棠主演之六場舞台劇《科學怪人》場場爆滿，昨日在上環文娛中心舉行最後一場，完美落幕，之後眾人即拉隊慶功。劇中Greg飾演天才科學家，跟扮演科學怪人的阿棠有多場打鬥衝突戲，為配合頹廢角色，Greg刻意自閉兼減肥15磅，瘦到剩番棚骨，有如紙板人，偏偏在戲內被力大如牛的阿棠又推又打，場場堅撻生魚，被掟出幾呎之外，令人睇見肉都赤。

Greg由排練至演出足足兩個月，全身瘀傷，冇忽好肉，但硬淨男神一句都冇呻過，他說：「都係跌瘀同撞親，唔係好金；最金嗰次係仆咗一吓，唔小心撼親額頭腫咗。我係瘦咗好多，但最緊要係要知道自己嘅情緒、心理狀態同身體狀況。拍《導火新聞線》電影版時係增肥有肚腩，呢次有個籍口俾自己瘦，只係減到成個人扁晒，踢波都冇力。」

Greg覺得演員每隔三兩年做一齣舞台劇，對自己極有幫助。雖然之前有不少人邀請他演舞台劇，但他會選擇劇本及對手，今次遇上歐錦棠，Greg已知道會擦出火花。「棠哥嘅製作唔會非常豪華，唔會好好待遇，我抱住嘅心態係學習，一定會教我好多嘢，有得着。呢次演出肢體同體力要求好重，每日演出完都好攰，但喺台上係滿足嘅，因為我哋從冇欺場。同棠哥合作係好開心，有新角色俾我試係好玩嘅，最難係準備角色，有好多心力上嘅嘢要準備，包括閉關、減磅、頹廢、唔食嘢，所以都幾吃力。」