《女神》洪荒之力內地爆發 欣宜廣州奪至尊金曲大獎

鄭欣宜挾《女神》於香港樂壇四大獎頒禮狂擸八獎大豐收。日前（16日），她前往廣州出席由香港Roadshow路訊通聯同廣東廣播電視台音樂之聲、珠江頻道等17家單位主辦的《粵語歌曲排行榜頒獎禮》，再奪「最佳MV大獎」及「至尊金曲獎」兩個獎項，當中的「至尊金曲獎」更是歌曲獎中的大獎，可見《女神》的洪荒之力，已爆發至中、港兩地。

對於奪得大獎，欣宜說很開心可以上到廣州，親自跟fans見面，：「過去呢一年《女神》帶咗俾我好多嘢，自己好幸運得到一首咁好嘅歌，亦都好多謝支持呢首歌嘅DJ朋友。我覺得呢首歌本身有個靈魂喺入面、有一個好重要嘅訊息喺入面，係話俾大家聽我哋要自愛。我覺得一首咁正能量嘅歌，可以攞到「至尊金曲奬」呢個大奬係一件好好嘅事，亦都希望大家可以由呢一首歌裏面得到正能量。」

頒獎禮後，欣宜即坐車返港，即日來回，原來為趕拍攝劇集《老表畢業啦！》。是次頒獎禮，欣宜是特別抽空出席，「呢排真係比較忙，因為拍劇就嚟完，時間比較緊迫。譬如我今晚攞完奬之後，都唔能夠一齊去慶功，要趕返香港，因為聽朝由早拍到零晨，所以呢排比較吃力。但係好似今日咁，可以上嚟廣州、可以唱歌，嘩！個心情好開心，上到去見到歌手朋友，又jam吓歌，嘩！實在好似係放假咁樣，哈哈哈！又可以見到晒我嘅fans，好開心，我淨係識得講好開心，因為真係好開心，哈哈！」