「梁寬」一家三口團圓 嘟嘟揭辭演《小男人》真相

鄭丹瑞 (旦哥)、周秀娜及鄧月平 (Larine)等領銜主演之雞年真港產賀歲片《小男人周記3之吾家有喜》，已鐵定年廿九上畫。今次《小3》由身材驕人的Larine扮演小男人「梁寬」囡囡，性感女神娜姐就做索爆女友，反而梁寬元配阿Ann (嘟嘟鄭裕玲) 未有參演，日前旦哥同Larine到到商台為嘟姐的《口水多過浪花》節目擔任嘉賓，一家三口團圓之餘，嘟姐更親揭辭演《小3》之謎。

自1990年合作《小男人週記 II 錯在新宿》，梁寬同阿Ann相隔27年後重逢，當日嘟姐在錄音室見「兩父女」出現，旦哥即爆Larine瘀事：「頭先呢個女好緊張，喺出面等要見阿媽呀？好急呀突然間，跟住衝咗入男廁。」

旦哥表示，之前很多網民都問《小3》會否有「Q太郎」(文雋) 及「大蠱惑」黎彼得出現？最緊張當然係阿Ann芳蹤，所以他曾誠邀嘟嘟演出，惜未能如願，嘟嘟在節目內就自揭真相：「旦哥有同我講過，但係旦哥好明白，我又唔係好想拍戲，我都好老實同佢講。隔咗一段時間後，旦哥話我哋買晒你戲入面(《小男人》系列) 嘅鏡頭，呢個戲 (《小3》)話阿Ann過咗身，當你係鬼咁出現，咁你配音得唔得呀？我就考慮啦，真係唔好意思，旦哥，我覺得如果我聲音演出都係演出，咁我不如拍套戲，所以就婉拒咗。」

嘟姐辭演，旦哥直認失望，「當然失望啦，我本來諗住約鄭裕玲出嚟，棟個劇本動之以情，再隊埋我將屋契出嚟，我想約佢，鄭裕玲話唔使出嚟啦，我已經心知不妙，即刻收番張屋契。但我完全同意鄭裕玲，你睇佢《口水多過浪花》做得幾開心，冇壓力，節目做得好，多人聽；TVB大騷，有農夫C君俾佢折磨，見到佢又好開心。」嘟姐隨即笑問旦哥：「所以我唔明點解你要出番嚟拍戲？你同我一樣咁開心。點解你咁辛苦呢？」旦哥則言拍戲不算辛苦，劇組又合作愉快，且他在60歲生日時承諾要送份禮給自己，就係拍小男人30週年作品，故今次都算追夢成功。

至於首次拍戲的Larine，直言曾擔心被飛，特別有一晚排戲後，她覺得自己出事，「死啦！我覺得自己唔得，離開戲仲有一段時間，都應該要換人㗎啦！」不過在旦哥教導之下，Larine很快重入正軌，投入角色。