【慎入】血腥生日會 張建聲鼻竇炎賀34歲

張建聲 (Justin) 今年生日相信係史上最難忘的一次。經過接近半年時間演出網絡劇《反黑》，飾演劇中癲狂反派「招積」的Justin已經角色入骨，近日劇集埋尾，Justin要同監製兼主角之一的陳國坤(小龍)拍一場大打戲，一拍就拍足三日三夜，過程血漿橫飛，非常黐線，即使撞正Justin 34歲生日，都係繼續打打打、殺殺殺。

不過劇組台前幕後好窩心，當日已準備生日蛋糕為Justin慶生，雖然畫面上Justin周身血、塊臉又血又瘀又青冇忽好肉，造型驚心，但實情場面就好溫暖，有小龍和導演宋本中(大王)獻唱生日歌，聯同全crew一齊切cake，期間大王仲大叫「一世鼻竇炎！」Justin就一路切餅一路抹鼻血，問你怕未！

原來Justin患鼻竇炎都係「招積」所累，他說：「因為拍嗰場戲係俾小龍打，所以我索咗啲假血喺個鼻入面，等啲鼻血慢慢流番出嚟，好辛苦架，因為真係會索到啲假血上個鼻，佢哋咪笑我鼻竇炎。」拍打戲當然唔好受，但Justin極之享受今次拍戲過程，「招積」的角色變化更令他不停有挑戰，所以講到生日願望，Justin依然以工作行頭，「希望工作排得滿滿，演出愈戰愈勇！」