台灣遇車禍 撞親頭入院 何佩瑜逃過大難：真係一秒鐘嘅事！

何佩瑜 (Jeana)近期在台灣拍攝電影《天使曾經來過》，至前日剛剛煞科，昨晨她在台灣卻不幸遇上交通意外，所乘坐的七人車車頭及車側炒至凹陷變形，當時坐於司機位旁的Jeana撞及頭、眼、鼻，同車10歲大馬小演員盧宣彤 (Debbie) 亦撼親頭及下巴，兩人立即被送院，好彩經檢查及照X光後傷勢無大礙，均已出院休息。

Jeana昨早乘坐劇組安排的七人車，從墾丁前往高雄，車程約兩個小時，原定抵高雄逗留一晚後，於今日返港。據知劇組安排了一位年輕女司機負責接載Jeana和小Debbie，但當車輛由墾丁駛去高雄的路段時突然失控，猛力撼向石壆，在車上瞓覺的Jeana嚇到花容失色，事後她和小Debbie感不適，齊被送院檢查。

回想炒車一幕，Jeana仍心驚膽跳，「發生嘅時候，唔係好知發生乜事，因為嚟得太突然，我都係第一次遇上交通意外。我喺醫院諗番轉頭，如果我哋架車當時係撞向另一邊，係會碌落山，可能上得香俾我，諗番好心寒，所以不幸之中大幸，真係好好彩！以前聽就就聽得多，呢次我感受到車禍嘅震撼力，仲要撞到咁大力，不能想像架車反轉嘅話會係點，真係好危險！」

現時Jeana的頭、鼻、眼依然好痛，有輕微紅腫，她苦笑前日拍潛水煞科戲時，已多次徘徊鬼門關，她說：「嗰日我要全程hold住呼吸，閉氣落到水底仲要做戲，自己每次想用盡啲秒數做戲，所以好脗先上水，試過控制時間錯咗差啲窒息，所以每一次上水，望到海面一唞氣就好感動，好似來來回回鬼門關咁，估唔到煞科再有車禍；以前冇諗過生命可以咁脆弱，今次意外反而令我諗到，真係在乎一秒鐘之間嘅事，而家會更加珍惜身邊人。」

留台兩個月，之前Jeana因為在墾丁學潛水傷及耳膜，而於當地睇醫生，豈料到留台最後一夜，又要入院，不過Jeana就為飾演她女兒的小Debbie心痛，「因為我同佢都受咗傷，佢撞親下爬，我撞親個頭，眼同鼻都腫咗；但最慘係小妹妹，佢同我一樣拍呢套戲時，喺台灣睇過兩次醫生，希望佢都快啲好番。」雖然小Debbie昨午已在facebook報平安，留言「逃過一劫」，但她upload了瞓病床及額角「起瘤」的相片，都係令人睇見肉赤。