長洲上演男人的浪漫 何浩文開live引洋妞

何浩文(Dominic)早前去長洲拍攝TVB特輯《玩轉香港日與夜》，昨晚他約同拍檔陳志健 (Otto)前往其開設於北角的日本飯糰店，一齊睇直播兼玩facebook live共度愚人節。其實前一晚Dominic已做功課，帶同手提電腦去舖頭開live做測試，豈料昨晚一玩live就斷線撻Q，好彩Otto開住微博直播，兩個男人共用一部手機玩live。

多才多藝的Dominic在直播時盡展所長，以廣東話、普通話、英語三語廣播回覆各地網民，期間亦徇眾要求講爛gag及唱歌；由於當時食肆仍於營業時間，一名外籍女顧客見兩位猛男開live玩到嘻嘻哈哈，仲主動要求合照。

在《玩》節目中，Dominic聯同Otto、黃子恆玩晒成個長洲，包括東灣、西灣、北眺亭、五行石等，作為香港人的Dominic要非透過今次拍攝，也不知長洲原來又大又多嘢玩，「今次係去長洲比較冷門嘅地方，去咗一個叫西園嘅營地，有障礙賽、平衡車、印弟安營，去嘅地方我連聽都未聽過，以前去長洲最多咪租間度假屋hea吓，所以呢次都係一個好體驗。」

去長洲當然要食好西，Dominic首嘗超巨型魚蛋，又自製芒果糯米糍，但整個trip令他最深印象的，竟然係男人的浪漫，特別係同首次合作的Otto勁啱嘴形，Dominic說：「最好玩係同Otto同埋子恆合作，尤其同志健唔使點跟稿就撞到啲嘢出嚟，我哋第一日就講好多以前細個嘅百厭史，所以第一日就friend咗。」