最新消息

一拖二澳洲萬呎跳傘 張建聲同女伴摷嘢贏稱讚

2017-04-05
張建聲 (Justin) 之前去澳洲為travelwebsite.com旅遊網拍攝廣告特輯,廣告商安排了兩位素人包括任職OL的晴晴和做model的Mandy同行,一王兩后拍住上做真人騷。在最新推出的兩集,Justin帶住兩個女仔攬樹熊、抱袋鼠、食海鮮、遊黃金海岸 Movie World,仲有喪玩刺激遊戲包括跳樓機、戶外射擊、熱氣球,最緊張同玩命就係首嘗當地最出名的跳傘 (skydive)。
Justin藝高人膽大,簽下生死狀上直昇機,由萬呎高空跳傘飛落地面,事後還大讚跳傘「好正、形容唔到!」他說:「跳降傘係要簽生死狀,因為要保證雙方,但簽之前要上堂,跟教練學一啲動作同手勢,要學晒先至可以簽。今次去澳洲玩咗好多嘢,跳傘係最深刻,我喺飛機門邊時其實好淆底,但一跳出去嗰吓free fall好正,好畢生難忘,係好好玩,人生必要試。」
拍廣告期間亦發生過一段小插曲,話說Mandy在車上跌耳環托,Justin即刻在車廂擒高趴低幫手搵失物,Mandy說:「佢有一幕幾感動我,就係跌咗耳環托嗰幕,佢好主動幫我去摷,趴晒落架車度搵,攝晒啲手指落去,我就企咗喺度唔知自己做咩嘢。」疑有蠱惑的Justin,係咪對Mandy有好感?他只說:「我作為一個男仔係gentlement幫個女仔搵嘢,盡男士風度啫,容後大家會知道發生咩事架啦。」