車禍後狂食生日飯 何佩瑜變素人湊B練EQ

何佩瑜 (Jeana) 十日前在台灣拍攝電影《天使曾經來過》期間遇上車禍，幸好福大命大，有驚無險，Jeana及其親友閨蜜都對今次逃過一劫十分感恩，其後Jeana回港，適逢日前(2/4)28歲牛一，身邊人個個都輪住為她慶生，生日飯食極唔完。

繼和男友翁子光及朋友開小丸子生日派對後，Jeana繼續與友見面開餐，她說：「噚晚我同幾個識咗十幾年嘅閨蜜聚會，我之前喺台灣拍戲，兩個月冇返香港，又大難不死又生日，所以呢排飯局好多，我好開心自己有一班好好嘅朋友，佢哋會支持你，你辛苦做完嘢，佢哋會戥你開心，呢個係一種力量，令你再去迎接第二個工作，感覺真係好好。同埋因為遇到意外嘅關係，好多朋友見番我都話曾經幻想會見我唔到，所以生死有時可以好脆弱，咁預計唔到，會係一瞬間，係好有感受，但一個禍又令我同身邊親友都有另一種體會。」

之前Jeana為viuTV拍攝真人騷《全職媽媽放大假》，昨晚節目首播，這亦是Jeana車禍後第一次看回自己的作品，真係百般滋味在心頭。節目中，她要湊一名兩歲BB，但湊B前要測試她對照顧小孩的能力，片內見到她帶兩個小朋友玩蛋糕玩具，又見她煮了一枱飯餸，但BB望也不望就走開，令她即時扁嘴。

最直接係四位BB的真媽咪視察幾位充任保母的女星的動靜時，直言對Jeana第一感覺麻麻，但經過「面試」後卻改觀，「初初對佢印象唔太好，但見到佢今日嘅打扮，起碼佢覺得咁樣係適合啲，講嘢都有條理。」事關Jeana為湊仔洗盡鉛華，淡妝冇set頭，衣着簡約，打扮與素人無異，反而贏到稱讚。

昨晚Jeana在網上重溫《全職》，當日湊B回憶即刻番晒嚟，她笑說：「我本身好鐘意小朋友，但湊小朋友係苦樂參半，好需要EQ同耐性，不過經過台灣嘅意外之後，再睇番呢個節目，係特別覺得要珍惜每一次嘅演出機會，呢樣已經係一件美好嘅事。」