猛男布吉玩爆房 張建聲湊一歲陳真嗌過癮

張建聲 (Justin) 早前拍完網絡劇《反黑》，隨即接下三部電影及另一部網劇，檔期排到密麻麻，所以《反黑》劇組拖馬去布吉旅行，起初Justin因拍戲冇期未能未行，其後因拍攝中的劇組突然喞出幾日假，Justin連隨執包袱漏夜飛去布吉會合《反黑》猛男團隊包括導演宋本中、監製陳國坤 (小龍)、李璨琛、吳毅將及姜文杰等。

今次布吉之旅，《反黑》全體人員都玩得勁開心，特別係小龍帶埋一歲囝囝陳真同行，B仔當然搶晒fo，向來鍾意小朋友的Justin就成日攬住陳真唔放，他笑說：「佢真係好可愛，精精靈靈、chok晒樣，但又第一次落水，成班uncle好似一齊見證住佢成長，好過癮。」

Justin以為去到布吉可以好relax抖番幾日，不過對住《反黑》一班猛男就想抖都難，事關成班人竟然玩爆房，其中「受害者」吳毅將慘被爆開房門，再被眾人拎水槍狂射，搞到成間房連床連人全部濕晒，Justin說：「好彩佢哋都玩到攰攰哋，因為我係last嗰幾日先join大隊，佢哋都冇心機搞我，如果唔係我諗我要拎行李頂住度門先瞓到，因為班人真係癲。」

此行眾人還上演男人的浪漫，除了行沙灘拍攝《反黑》mv外，又望住個無敵海景view促膝談心，雖然Justin形容幾日旅行頻撲過返工，但始終大家開工時對足七、八個月，再靜下來談天說地，感覺的確寫意而且好有風味。