娜姐蔡瀚億陪慶生 欣宜東莞許願有拖拍

電影《29+1》在港澳兩地上映至今累積票房逾千二萬，且贏盡口碑，出品方中國3D數碼娛樂特於昨晚(31/5)舉行慶功宴，主角周秀娜 (Chrissie)、鄭欣宜 (Joyce) 、蔡瀚億 (BabyJohn) 、金燕玲、楊尚斌、編劇兼導演彭秀慧為《29+1》均有出席，場面熱鬧。

《29+1》明日(2/6)全國上映，一眾演員今日已起程去廣東省繼續進行路演及宣傳。其實在過去一星期電影團隊不停穿梭中港兩地造勢，前日(30/5)團隊身處東莞，並於當地一戶外廣場舉行發佈會，現場過千市民人頭湧湧，但大會相當貼心，安排了50名保安在場維持秩序。

當日適逢是Joyce的29+1正日生日，大會在台上準備了切蛋糕儀式，讓fans和Joyce一齊慶祝牛一，場面熱鬧又哄動；之後眾人到當地多間戲院謝票，回程返回酒店房間休息時，導演彭秀慧繼上次同娜姐搞驚喜生日會後，亦為Joyce舉行神秘派對，由娜姐和BabyJohn推住餐車送上生日cake及香檳，令她非常意外又開心。眾人大唱生日歌，Joyce即場許願：「祝我認識嘅各位身體健康，每日都要愉快，《29+1》票房大賣，同埋快啲搵到個真命天子！」

事後Joyce說：「嚟東莞出席《29+1》發佈會，嘩，好多人，好開心，今日係我正日生日，除咗同大家分享我哋嘅電影之外，亦有好多人同我一齊慶祝生日，所以yeah！好開心！希望東莞嘅朋友都會鍾意我哋部戲。我嘅生日願望係《29+1》喺內地6月2號上映之後，票房大賣。」

娜姐日前才度過生日，Joyce生日當天亦有兩個蛋糕，所以為對方開生日會後，娜姐就笑說：「感覺好飽，食咗好多蛋糕。其實喺香港未過生日時，大家已經一齊做緊《29+1》宣傳，今次冇諗過時間夾到咁好，我哋喺內地宣傳期間，會喺東莞咁齊人同Joyce慶祝生日，今個生日佢啱啱29+1，做緊跑戲院，同觀眾一齊過生日，我覺得好難忘，我哋兩個嘅29+1都橫跨呢部戲。」

至於BabyJohn亦係一肚cake，他說：「呢幾日路演連續兩個人生日，大家一齊慶祝係好開心。我哋謝票時，本身院商有切蛋糕儀式，又有兩個壽星女嘅生日蛋糕，所以總括個trip係好多蛋糕好多蛋糕好多蛋糕。」而彭秀慧亦對Joyce生日特別有感受，「好難得Joyce喺踏入30歲呢日做《29+1》發佈會，只得一次咁嘅機會，好感動，因為佢能夠將生日呢日同我哋做宣傳。」