《常在你左右》年底上畫 Chilam肢解林家棟 林雪「爆粗」

港產片經典《陰陽路》系列，新作《常在你左右》今年上映，一眾演員包括張智霖、阿Sa蔡卓妍、佘詩曼、林雪、雨僑，今日齊齊在上海出席發佈會鬥講鬼故。發佈會上同時宣布電影將於萬聖節檔期上映。

會上幾位演員講到拍攝時奇怪經歷，張智霖唔小心劇透，表示最難忘係要肢解林家棟：「平時劏雞都唔會，今次就要將林家棟條屍體肢解，個感覺好特別。」其實今次導演係拍過《人肉叉燒飽》嘅邱禮濤，肢解呢啲例行公事啦。

阿Sa就表示自己細細個已經睇過《陰陽路》系列，但其實好怕睇恐怖片，即使依家都唔敢睇。林雪講到自己角色同套戲有關嘅道具係黑膠碟，用國語講出「稀鳩碟」時仿似講粗口，全場大笑。

佘詩曼話片中係同古天樂做一對，兩個好恩愛，夜晚仲特別有情趣，兩個會跳下舞咁。至於雨僑，知道拍呢部片可以同到林家棟合作好開心，點知劇情安排呢一對係冇機會做到對手戲，所以好可惜。發佈會最後由各位演員齊齊倒紅酒入冰棺，以血紅色現出「萬聖節見」幾個大字作結。

此外，一眾演員在上海電影節紅毯非常忙碌，古天樂、林家棟與黃柏高，葉偉信，鄭保瑞及吳樾行畢《殺破狼·貪狼》紅毯，隨即趕急轉身加入隨後也是有份主演的《常伴我左右》。當中女主角之一的佘詩曼，以一條仙氣露肩薄紗魚尾裙現身，雖然艷壓全場，但魚尾裙設計「好睇唔好行」，加上大會安排一眾演員行完紅地毯後，要走一條又長又斜的樓梯進入大劇院，助手未能與她同行的阿佘，根本無辦法行上樓梯，幸好有戲中男主角古天樂在身邊，古仔man爆化身人肉扶手，緊緊托著整個身軀不斷傾側的阿佘，一級一級走上樓梯。靚，是要負出代價，阿佘事後自嘲說：「我就好似一條八爪魚，因為吸住咗個地，行唔郁！」