最新消息
潮文伯母vs非常外父 柏豪為上車惡戰盧苑茵
2017-08-01
盧苑茵 (Madam Lo) 年前在公屋潮文網上短片內，扮勢利「伯母」hit盡一時，對住公屋、居屋或者私樓嘅未來女婿，分別可以天同地。時代進步，但香港住屋問題繼續劣化，居於豆腐膶咁大嘅太空艙，租金仲貴過公屋，所以「伯母」回歸，只係更勢更利，今次硬哽伯母寸嘴嘅未來女婿對象就係周柏豪。
9月7日上映、改篇自向西村上春樹的《西謊極落：太爆‧太子‧太空艙》，就出現一對專睇仔女拖友住乜屋的「世伯」同「伯母」。在《西》片先導預告中，飾演太空艙艙客的窮鬼周柏豪，去茶樓見女友連詩雅阿媽盧苑茵，期間提到想結婚，「伯母」Madam Lo 連珠炮發，快、狠、準講完 ─「冇得傾、冇可能、唔使講嘢」。
「還原善良媽媽」
對住充滿氣場的Madam Lo 做對手戲，柏豪就說：「嗰日拍見未來外母嘅戲都幾得意，Madam Lo 真係好好戲，做外母幾有霸氣，但一cut機就還原善良媽媽，大家雞啄唔斷，有講有笑，所以拍得幾順利。」
柏豪的角色是個有大學學歷又靚仔的網絡打手，但都係敵不過現實問題，「其實我個角色都好寫實，係啲後生仔遇到社會真實面對嘅問題，好似住屋、結婚、生仔，都有好多嘢煩，有時啲長輩又未必明白；不過唔可以一竹篙打一船人，都有一啲長輩係開明嘅。」
小喬嘆上車難
至於戲中的另一條線，就有「非常外父」鄭丹瑞助陣，飾演其女兒「可兒」的杜小喬被老豆mark到實，即係要追到小喬，有車有樓有得傾，冇車冇樓兜巴星。小喬覺得當日拍戲都好有趣，「我個角色可兒嘅設定係俾爸爸縱慣嘅女仔，一定要有樓有車先嫁；但夠愛嘅話，我唔認為一定有樓有車先結到婚。」
時下年輕人上車艱難，小喬亦有同感，「香港房屋問題係令情侶、準婚人帶嚟壓力，年青人的確好難上車，我都唔年青但都好難上車，咁我哋唯有繼續打吓工，儲吓錢啦，雖然都唔知儲到幾時....哈哈。」
