最新消息

「矢吹雪」打拳上A1 林雪同80磅瘦仔激戰

2017-08-01
林雪早前在主持的音樂節目《林說金曲》中,展示林氏爆笑系列,例如扮張家輝打拳、跳肚腩舞等都震撼網絡,打拳一集的總hit rate更加超過150萬點擊,勁到冇朋友,仲隨即引來廣告商注意,Carousell二手買賣平台近日就食住條橋,邀請林雪拍攝一個以打拳做包裝的廣告,並於日前播出 ( 廣告宣傳片參考: www.facebook.com/carousell.hk/videos/783765825136286 )
 
拍攝當日,其實林雪都風塵僕僕,他說:「因為啱啱喺青島拍完戲返香港,一落機就即刻拍廣告,一拍就拍咗十六個鐘,都未試過拍廣告拍得咁辛苦,不過廣告嘅故仔幾得意,最緊要大家鍾意,咁點拍、點辛苦都值得。」
 
至於廣告內容,原來係一場遊戲一場夢。講述林雪在家中無意發現拳套,想起當年自己係幾咁fit,個身係而家開邊、得一半咁瘦,於是一心打拳練大隻,結果在擂台上打出一片天,由一拳打暈80磅嘅瘦仔,到打贏全身爆肌嘅大隻佬,拎埋金腰帶,打世界賽打到上A1頭條,被傳媒形容為「宇宙最強男人矢吹雪」、「21世紀最重磅頭條、林雪百人斬」,就連出街都俾一大班女fans狂圍,爭住餵食蕉,享盡食廢人餐之福,巴閉到無與倫比。
 
可惜花無百日紅,林雪終於遇上宿敵,林雪一拳打落書櫃....喺呢個時候,夢醒時份已到 ─ 林雪成個拳頭傷晒,紮住紗布慘變豬手。原來所有威水事都係夢一場,藉此帶出人會再有追夢機會,為舊物展開第二人生。整個故事大橋有創意又有趣,林雪捱16粒鐘都抵番。
 
咪以為林雪打拳只係劇情需要,現實佢都幾鍾意運動,儘管每次都係得個「講」字同「買」字:「每當我自己覺得好似好肥,就會買對錏鈴返去練吓,次次買咗都未拆開,跟住就唔記得咗,放咗喺度,所以依家屋企有好多體育用品都係生晒銹。」
 
同好多人一樣,為咗唔好嘥嘢,林雪都樂意嘗試將舊物轉售,「就咁影張相,撳個掣,有人買就俾佢,等件嘢有第二次生命,又環保,又可以造福人群,成個過程唔係好難,只係我拍廣告就幾辛苦啫!」