加國開騷全爆 張繼聰high唱戰勝Jet lag

張繼聰近年由唱歌轉戰拍戲，成為影壇寵兒，戲接戲冇停過。不過上星期阿聰就去加拿大開騷，全場接近5,000座位爆滿，觀眾反應又超好，令已有兩年未曾開騷的阿聰非常開心又high，戰勝 Jet lag 完全唔識攰。

今次阿聰去加國非常趕，一落機就趕去綵排，一完騷又即刻回港，但他對開騷過程很enjoy，所以他在facebook說：「多謝今日嚟捧場嘅 Toronto 朋友們，你哋嘅熱情令我戰勝咗人類嘅生理時鐘，今晩玩得非常盡興，希望大家 enjoy。」

阿聰表示，當晚觀眾的表現令他好感動，「每次喺加拿大呢啲地方開騷，有咁多樂迷、觀眾支持自己係好感動，我啱啱開始歌唱事業嘅時候，真係冇諗過我喺後樓梯寫嘅歌，估唔到有日會去到咁遠嘅地方，有咁多人捧自己場，所以好衷心感激大家，感覺係好奇妙。」

在加國來去匆匆，阿聰此行並無逛街時間，唯一係去健身室繼續操 fit，他笑說：「我都冇咩時間留喺嗰邊，因為香港有工作，過到去綵排、on show，第二朝即刻返嚟，但好開心嘅，都見到吓嗰邊嘅風景。」阿聰是唱家班出身，當然鍾意唱歌，但暫時他仍會以電影工作行先，他參演的笑片《西謊極落：太爆‧太子‧太空艙》更會在星期四(9月7日）上映，故在港開騷的計劃要將來再打算，「所以係掉番轉，我好珍惜每次唱歌，當然唔否定第日仲會唔會出唱片啦。」