偕鄭俊英釜山蜜遊 雨僑着比堅尼老貓燒鬚

雨僑 (Ava) 在今個下半年工作未停過，忙完票房大收千萬的電影《西謊極落：太爆‧太子‧太空艙》宣傳後，參演的另一部新片《常在你左右》又於本月26日上畫，而早前她與韓國型男鄭俊英在釜山拍攝新一輯的 tvN Asia 原創旅遊節目《都市蜜遊》《 MY Unexpected Sweet Trip 》亦即將推出，節目中 Ava 將會與鄭俊英展開一段恨死唔少女 fans 的四日三夜浪漫之旅。

 

Ava 在韓國釜山期間，試過同鄭俊英齊坐吊車上山頂、食海鮮，又到訪韓劇《鬼怪》的燈塔景點，齋聽都浪漫都痺。不過去到海雲臺海灘，浪漫就開始走樣，Ava 笑說：「節目組叫咗我哋準備泳衣，我就着咗比堅尼，點知去到係好曬，啲韓國人着晒防曬衣，鄭俊英仲帶晒帽着晒長袖衫，我就曬到燶晒，可謂老貓燒鬚，結果要去韓國護膚品店買防曬品急急咁搽，但膊頭都係曬燶咗。」

 

浪漫背後，Ava 都有好多搞笑事，其中一單是她和鄭俊英乘坐的專車，一如其他韓國真人騷般，在車廂裝上五、六部攝影機，拍攝兩人在車內的對話和動作，當工作人員等緊 Ava 同鄭俊英有何密偈時，Ava 的反應卻令人哭笑不得，「因為我好攰，瞓着咗，唯一同鄭俊英喺車廂入面嘅秘密對話係：『唔該，我想問個櫈背點樣可以再瞓低啲？』跟住我就瞓番，到醒咗時好似浪費咗工作人員喺車度拍攝嘅一番心機。」