直迫恐懼鬥室斷指瓜六件 12億人睇張建聲大屠殺

張建聲 (Justin) 參演之4K神級網劇《反黑》，眨眼已去到結局周，該劇全國總點擊已接近12億，成績驕人。人氣暴升的 Justin 在劇中飾演的社團狂派「招積」，在近兩集已經回歸，劇情就講到「招積」自從被陳小春這個警方臥底搞到雞毛鴨血，又被幕後操控的大老虎捉去電殛洗腦，將他訓練為聽話傀儡去選社團辦事人，被電到變呆滯傻仔的「招積」為了向社團補償過錯，要慘被切斷尾指贖罪，但他竟然不痛反笑，仲拎住斷指放在枱面俾社團元老陳惠敏、黃樹棠及何啟南欣賞，感覺心寒。

 

其實這場斷指戲只係前菜，緊接「招積」偶然三分醒，回想從前種種就突然狂性大發。據知，張建聲在戲中將會瘋狂殺戮，連冧六人，當中包括在今晚播出的第27集中、在K房被張建聲施恐怖酷刑殘虐至死的「火屎」吳毅將 (Ben)，血腥加 cult 的程度直迫《恐懼鬥室》，極重口味；另外在劇中扮演退休「大sir」的陳欣健，最後亦被張建聲綁炸彈遭夾生炸碎。

 

今晚半夜播放的新一集《反黑》，在預告片 ( https://www.youtube.com/watch?v=cyiFUFvSneQ ) 內已見「招積」四出向古惑仔霸氣偷桃；另一幕則是「火屎」挑釁「招積」圖爆大鑊，結果吳毅將就被張建聲打針麻醉，然後縫咀、挖眼，齋聽都恐怖，張建聲亦說：「死咗火屎哥嗰場真係不得了，首先多謝 Ben哥先，『火屎』搵『招積』係講以前喺監獄點雞姦佢，講完又摑佢，Ben哥係經驗好豐富嘅前輩級演員，好馴熟、零架子，個人超級nice又好玩，又有好多idea，無論幾多場戲都好，佢都清楚自己功能性喺邊度。嗰日我成日同 Ben哥做對手戲，拍前佢縫咀都幾粒鐘，又唔飲得水又唔食得嘢，但佢係好樂意接受呢啲刺激眼球嘅嘢，respect。至於場戲真實係點，大家今晚睇咗就知啦。」