網民轟《反黑》4K變低清 張建聲血吞吳毅將死link被鬧

以4K為賣點的12億點擊話題網劇《反黑》，日前播出27集卻惹來網民大投訴，首先是網劇原定凌晨12點播出，結果遲了15分鐘開播，但網民知道昨晚戲肉到，為睇癲佬「招積」張建聲變態生吞曾在獄中雞姦他的「火屎」吳毅將，都肯耐心等候；豈料播出之際，竟然變成低清360畫面，《反黑》官方facebook未幾亦公佈因出現技術問題要搶修，預計10分鐘後回覆正常，可惜網民等等等，結果都係得720，而且在劇集後半部更出現畫面字幕不同步的錯誤，唔嘈到拆天就有鬼。

《反黑》第27集連死四件掀起高潮，包括扮差佬的林嘉華，飾演社團成員的駿雄、黃樹棠及吳毅將，「招積」成魔加「火屎」之死更係全劇最重口味最恐怖的一幕，但昨晚遲播、低清、錯字幕不特止，死link都仲有，當然令觀眾冇癮。對此張建聲亦深感抱歉，「真係唔好意思，噚晚係出現一啲技術問題，但劇組有技術人員24小時睇住，已經即刻支援，佢哋係好努力解決問題，希望以後避免發生同類事件。」

提到「招積」虐殺「火屎」該場戲，的確令人毛管戙，「招積」麻醉「火屎」後，將他縫咀、再騎在他身上咬甩對方的眼珠，嚇到「火屎」瀨尿，最後仲生吞這個仇人，成口血的張建聲都真係好難頂，不過依然獲網民大讃好演技，張建聲則說：「其實嗰場戲開頭設定冇咁血腥，係導演 (宋本中) 突然話外國有個案例，係隔離屋長期恰一個人，結果呢個人大個咗之後，將隔離屋全部人食咗，中仔將呢個案例擺喺『招積』身上，因為呢個角色嘅怨恨、屈辱，唔係言語可以抵銷，係變態到要將成個人吞噬。嗰場戲基本上冇對白，全部係即場望到『火屎』嘅第一身反應，完全任我做，Ben哥 (吳毅將)又做得非常好，就堆砌到個恐怖感出嚟。」