最新消息

《棟篤特工》預告007發威 子華神阿佘30萬點擊爆like

2017-12-19

 由黃子華同佘詩曼主演嘅2018年賀歲片《棟篤特工》,先導預告噚日(12月15日)下晝五點發佈。截至今午,先導預告上載喺官方專頁(https://m.facebook.com/story.php?story_fbid=1581329598627142&id=178314478928668)未夠24粒鐘,已過30萬點擊!超過六千reactions、四千分享、千六留言!反應超hot !

大批網友在Fb tag朋友名字、呼籲新年一齊入戲院捧場,亦有不少人留言,「難怪我single左咁耐,原來世界一路都唔和平」、「片頭都咁正,一定要去支持港產片」、「終於等到子華有戲,仲係過年添,希望可以好似家有囍事咁,每年賀歲一部,過年可以睇部笑得落嘅戲」。

喺《棟篤特工》中,子華神飾演特工,阿佘扮演madam,組成港版007。不過做特工難免會出賣身邊人,早年仲係處女嘅阿佘都係受害者!當日東窗事發,阿佘仍天真問:「即係我哋唔結婚喇?」子華即時以金句神回:「世界一日唔和平,我好難兒女私情。」難怪先導預告內,見子華神風度翩翩被靚女大包圍,但阿佘就憎到佢入骨,數子華神「罪大惡極」之餘,仲嬲得發火開槍。

此外,子華神噚亦親自拍片放上個人fb專頁,佢話:「呢條先係《棟篤特工》第一條正式宣傳片,之前嗰啲係假嘅,我哋冇咁馬虎,呢條係真嘅,大家分享吓。」