石詠莉喊唔停 鄧健泓變臉論high爆婚宴

鄧健泓 (Patrick) 和石詠莉 ( Sukie ) 日前在九展 The Glass Pavilion 舉行婚宴，筵開二十席。宴會一開始，先由新郎哥唱情歌拖住 Sukie 入場，當時 Sukie 已開始眼濕濕，其後一對新人上台，Patrick 以有趣的變臉論來形容這幾年的感情經歷，令全場掌聲不絕。

Patrick 表示，和 Sukie 拍拖兩三個月時，與對方父母食飯，但外父外母黑臉相對，「我外母話，我個女係我心頭嗰塊肉，邊個蝦佢我唔肯過佢！我知道用口講冇用，呢幾年用行動去顯示真誠，所以呢幾年佢笑番、臉色紅潤番，但最近又黑晒，因為我哋話結婚後冇諗生....住；Sukie 爹哋亦係經常臉黑，因為佢要出海工作，人生中冇咩男人感動過我，但我好記得 2014 年同 Sukie 自資出第一張唱片嘅時候，有晚食飯惆悵緊啲錢點用，外父同我講，『有咩諗唔掂，出聲！』嗰下我被感動。」

Sukie的父母一直對 Patrick 很支持，而 Patrick 和 Sukie 亦各自在台上多謝家人及朋友與他們一起共度種種階段，Patrick 當然感謝老婆，特別係讓他經歷了臉色由青變黑再變紅，他說：「多謝我身邊另一半，佢令我臉青過，因為我哋試過好多唔同嘅經歷，都幾得人驚；我試過臉黑過，有時見我好嬲；當然都試過令到我面紅耳熱，嗰晚我哋第一次寫歌，搞到我臉紅耳熱....多謝佢信任我，令我成為更好嘅男人。」

向來都係喊包的 Sukie 聽到 Patrick 的真情說話，全程一直眼濕濕抹淚，Sukie說：「多謝父母教識我唔好怕蝕底，努力有回報。以前我嘅世界，用標點符號嚟形容，永遠都係得一點、一點，好多無奈、無言，唔知點樣表達，好封閉自己，對好多嘢好冇信心，係Patrick令我堅強，令我嘅世界好多色彩，唔止逗號、仲有感嘆號！」兩人更在台上擁抱及開香檳，雖然沒有玩新人或特別環節，整個宴會非常簡單，但溫馨感人。