婚後第一job大塞車 鄧健泓中山做忍者

鄧健泓 (Patrick)上星期做老襯，與石詠莉 (Sukie) 舉行婚禮後，翌日隨即去中山商演搵真銀。不過，搵銀背後除咗用心唱用心做之外，仲要 ─ 好忍得！

話說當日Patrick直接由香港坐車去中山，演出完畢回程返港時，原定兩個半小時的車程，結果因為內地放除夕元旦假，廣東省大塞車，Patrick差不多坐了四個鐘頭車先返到香港交人，他說：「嗰日塞車塞到阿媽都唔認得，呢個婚後第一job非常之難忘。第一，出發前要處理婚後回收物資，係處理到朝頭早，瞓得兩個鐘就要出發去心山做嘢。塞車冇咩所謂，但最遺憾嘅係，人有三急咁點樣好？結果係忍忍忍、忍忍忍，忍咗好耐、塞咗好耐，先終於捱到搵到個廁所。」

急到咁嘅經驗，Patrick唔係第一次，「對上一次係廿幾三十年前，我喺外國留學嘅時候，代表Edmonton (艾德蒙頓) 去其他省比賽田徑，架旅遊巴坐咗好多學生，當時我好急，急到停站時係痛到起唔到身、行唔到路，最諷刺係到中途站去廁所都仲要排隊，好記得嗰次我足足去咗兩分鐘先圓滿解決，今次都拍得住加拿大嘅忍者經歷。」Patrick笑言諗起做忍者已經打冷震，唔好亦唔想再發生。