4月紅館開騷搏盡 欣宜血手揸柺杖影海報

鄭欣宜 ( Joyce ) 自組新公司「Passionfruit Records」後，即推出《你是什麼時候開始不愛我的？》一曲及拍攝話題 MV，與 Mastamic 合唱的新歌《 Not Afraid 》亦已派台。踏入 2018，Joyce 更有大搞作，就係鐵定於4月22日舉行人生中的首個紅館騷《 BREAK a LEG 鄭欣宜演唱會2018》。

今次個唱主題「BREAK a LEG」，除了因為 Joyce 左腳受傷外，亦另有寓意，Joyce說：「Break a Leg 係 good show 或者 good luck 嘅意思，因為行內唔興講 good luck，又咁啱得咁橋我整親隻腳，所以我哋好想有一樣嘢可以代表到，無論做任何事都要付出努力，同埋表達一種奮鬥嘅感覺。」

今日 Joyce 的演唱會先導海報正式曝光，日前她進行拍攝時，由於其左腳仍打石膏，所以要坐低拍攝。身穿黑色低胸連身裙、披上紅軍褸的 Joyce，將紅珠片撒在手上，有如血手撐住柺杖。另一個鏡頭，Joyce 就捧起一個有刺的金色心臟，代表連個心都俾埋觀眾，事關第一個紅館演唱會，對 Joyce 係非常重要，她希望將自己最好的都表現出來，為了演出一定搏命，不顧一切豁出去。

Joyce 說：「所以我拎住一個有刺嘅金色心臟，係希望話俾大家聽，即使我捉到呢樣嘢，都要有犧牲、會痛或者受傷，過程唔容易，但我會好努力，盡量令到演唱會做到最好。金色心臟係代表兩種意思，一個係我送自己個心出嚟俾觀眾，而從另一個角度睇，係我好希望得到大家嘅心。」