「床上啲嘢冇做好多年！」 林雪攬女跳辣舞直入醫院

鐵定2月15日年三十晚正式上映之狗年賀歲猛片《棟篤特工》，主角有子華神、佘詩曼就全城皆知，戲中多位友情客串的嘉賓演員亦會陸續曝光，其中一位重量級助陣演員、就係體重超過300磅的林雪。

林雪BB今次係《棟篤特工》入面搏命演出，拍到瞓醫院；講起，源頭就要倒帶：去年三月林雪憑《樹大招風》於「第十一屆亞洲電影大獎」奪得最佳男配角，當晚得獎後他接受傳媒訪問時，曾透露之前拍《棟篤》後頭暈，結果要入院檢查，可能係因為耳水不平衡導致不適。今日，還原當日林雪拍攝《棟篤》實況，原來係拍偷情戲，又要同惹火鬼妹床上跳艷舞又要走來走去避大婆捉姦，結果搞到暈低直入醫院。

林雪拍攝被捉姦戲的花絮片今日曝光(拍攝花絮鏈結：

(https://m.facebook.com/story.php?story_fbid=1620664251360343&id=178314478928668)，其實呢場戲幾好笑，講述林雪飾演的馬總瞞住老婆去酒店爆房，同着性感內衣嘅鬼妹喺床上大跳辣舞，唔知幾咁happy，但踩住軟腍腍嘅床褥跳舞特別攰，所以香艷火辣嘅背後，林雪唔止跳到差啲甩褲，仲跳到冇氣，「跳完乜都唔使做，床上啲嘢冇做好多年！」

拍攝之前本來林雪好風騷，不時爆粗，又搞笑地拎隻襪塞住大婆把口，點知埋位跳完辣舞後即刻散晒，好彩並無大礙，林雪BB好快又回復生猛風趣。