最新消息

罗力威足料过大礼 雨侨:妈咪笑到见牙唔见眼

2018-03-12
距離結婚尚有三個禮拜,本月31日在香港註冊擺酒的雨僑 (Ava) 和羅力威昨日按傳統習俗過大禮,並由阿威的家姐負責統籌,一身紅噹噹的準新娘 Ava 就在家中等候,不過這位最潮新娘子唔單止開live,仲獲細心老公阿威派親友送咖啡,夠晒風格。
過大禮傳統係新人避席,Ava在屋企等候,阿威就陪家姐拎過大禮的大堆禮物到女家樓下,雖然阿威不能上樓,但就請親友送咖啡俾 Ava 享用,小小的細心舉動已令準老婆冧到不得了,Ava 說:「過大禮送埋咖啡,佢真係好細心嘅!噚日過大禮之後,我哋一家人去咗飲茶,將過大禮收嘅禮帶返去長洲,因為我喺長洲長大,仲有親戚係嗰便。」
Ava 對阿威讚不絕口,更難得係她的父母都對準女婿俾足一百分,因為阿威有心意有誠意,時下好多人過大禮都係懶人包套餐,但阿威做到足,Ava表示:「我爸爸媽媽從簡都得,但男家好好,佢哋搵海味時,原來鮑魚、髮菜、冬菇等等都有好多唔同等級,好彩識朋友幫手,樣樣都買啲,意頭啦。其實最緊要心意,噚日樣樣都好開心、好滿意,我媽咪都笑到見牙唔見眼。」