《小男人》势破1,600万庆功 郑丹瑞拖女三日谢晒

由鄭丹瑞 (旦哥) 自把自為自導自演之小男人30週年招牌作《小男人週記 3 之吾家有喜》，這部雞年唯一一部真正港產賀歲片，由年廿九 ( 26/1 ) 上映至 ( 12/2 )，合共 16 天累積已逾 1,500 萬票房，且贏盡口碑。1989 年第一部《小男人周記》票房收 1,600 萬，1990 年《小男人週記 II 錯在新宿》票房則收近 1,000 萬，依照《小3》目前進度而言，勢破 89 年第一部的票房紀錄，再創小男人經典。

中國 3D 數碼娛樂除了《小3》票房獲佳績外，旗下另一部勇奪金球七大獎項兼獲奧斯卡 14 項提名之荷李活人氣歌舞片《星聲夢裡人》( LA LA LAND )，至昨更勁收近 2,600 萬，兩部戲合共累積票房 4,100 萬，故電影公司已定於 ( 15/2 ) 舉行慶功宴，大事慶祝。

打正港產牌頭賀歲，《小3》能收千萬票房，旦哥當然開心，日前他連續三日拖住囡囡鄧月平 ( Larine ) 及談善言，走遍港九新界各區戲院謝票，答謝觀眾支持。雖然旦哥當日抱恙兼臉腫，三位演員亦因謝票勞累謝到攰，但觀眾熱情能醫百病，旦哥甚至開金口清唱片中插曲《傾心》，冧得觀眾尖叫不絕。

旦哥表示，觀眾買飛入場令他如注強心針，每次他偷偷入場睇反應，聽到觀眾笑聲真係乜都值，「我覺得謝票謝得唔夠多添，謝票好好玩，如果真係想知自己做成點，最緊要入去睇觀眾反應，你睇自己寫嘅位中唔中，一中就會好開心，同觀眾會有同喜同悲嘅感覺。」旦哥最希望慶功當晚，台前幕後所有部門的戰友都可以出席，他說：「我要親自多謝大家，因為冇佢哋同我喺嗰 23 組入面咁拼搏，然後後期宣傳又係，每一個部門都喺度就好啦。今次當自己贏咗好多嘢，呢套戲係憑小男人週記五個字，小男人真係仲有個magic，大家念念不忘，後生仔都 ok 喎。」

首次謝票的 Larine 進步神速，由第一日啞女變成嘴焦焦，她笑說：「第一次謝票有啲怕醜，見到觀眾唔知講咩好，原來謝票謝得多個人會嘴焦焦。」