孖马明揸的士撞鬼 赵永洪台庆剧爆粗照出街？

無綫台慶劇《降魔的》將於下周一 (30日) 首播，有名你叫「降魔的」，故事就係講述一班的士佬見到撞到鬼鬼怪怪，劇中馬國明和綠葉王趙永洪都係飾演的士司機，兩人係好兄弟，馬國明角色叫「馬季」，趙永洪就叫「陸嘉一」、即係「Seven」、「柒」；至於角色特點，就係全劇最chok的士佬，一味懶有型。

趙永洪在《降魔的》第一集就出場，他在拍攝該集時，竟然在鏡頭前粗口直出，「其實開工之前我有同監製 (方駿釗) 傾過，話俾我講粗口啦，因為大部份的士佬好粗口，佢話唔得，我話唔緊要，嘟咗去咪得囉，反正電視都好似未試過，後尾監製又俾我做，咁我都有講到粗口，我諗會嘟咗去啩？不過到最後就唔知點處理。」其角色都係整蠱造怪，其中一幕講他揸的士夜載一身紅衣的莊思敏，嚇到三魂唔見七魄，後來先發現莊思敏係做知客，錯摸之下笑料百出。

講到平日開工，現實中經常坐的士出出入入，趙永洪曾經遇上超好人的司機，又試過遇上激到嘔血的司機，他說：「依家呢個年代都好多的士司機係大佬：接唔接你，佢揀；行邊條隧道，佢揀；上車路程短，黑你面，我試過啦，個司機係咁chok、係咁dup brake，好乞人憎，結果我直情開聲：『師父，唔得啦，如果再chok架車，我嘔架啦！』」呢次近乎嘔的經歷，的確令趙永洪好難忘。