Update News

直擊演唱會備戰 欣宜忍腳傷 痛練橫叉一字馬

2018-03-12
鄭欣宜 (Joyce) 近日開始為 4 月 21 及 22 日一連兩場的紅館演唱會備戰,但其左腳傷患未癒,現時仍需接受物理治療,不過事實又距離舉行個唱只得個半月時間,加上勁歌熱舞係不能缺少的環節,所以 Joyce 亦要開始熱身,練習拉筋及簡單舞蹈。
 
Joyce 日前去排舞室,跟隨合作無間的跳舞老師輝輝做一些簡單熱身動作,這是她受傷後的第二次練習,所以都有些少緊張,當排舞老師為她拉筋,試練橫叉一字馬時,Joyce 痛到掩臉大叫,老師叫她 relax,休息一會再練,之後 Joyce 抖順條氣,再練習朝天一字馬。由於近兩個月 Joyce 因腳傷暫停運動,傷未好及筋骨有點硬,所以再練效果已算 ok,但又未致揮灑自如。
 
Joyce 說:「係要慢慢嚟,但係又唔可以真係好慢慢,因為 concert 好快都殺到嚟,我冇事架....」說時她都有點眼紅紅;其實在場同事都知她忍住痛練習,個個戥她肉赤, Joyce 卻反過來安慰大家不用擔心,還自我鞭策:「紅館好難得吖嘛,有輝輝喺度,唔會俾我亂嚟,但我都要 push,所以攰少少、痛少少...少少嘅痛當然唔會癲,但係要 push 先有進步。」
 
當日 Joyce 去排練,整體都好靈活,跳舞時節奏感強勁又有力量,只係一直強忍腳痛,完成排練後,她的左腳眼位置腫脹,落樓梯都隱隱作痛,但 Joyce 為了做好演唱會,一定會堅持下去,所以全公司同事和身邊友好都為她打氣,給她無限量的支持。