Update News

吹牧童笛唱走音歌 張建聲嘈交搞喊陳嘉莉

2018-03-12
鐵漢柔情點玩法?張建聲 ( Justin )就喺女友陳嘉莉 ( Kelly ) 面前親自表演。這對小情人日前拍攝網站特輯,Justin 在節目中為俾女友 big surpise,就特別苦練自己最冇天份嘅樂器,左揀右揀之下,結果他選擇跟帶高達頭盔嘅「潮吹大師」學吹牧童笛,打算連吹帶唱兩人愛的主題曲、Dear Jane 的作品《哪裡只得我共你》。
 
拍攝當日,因病失聲的 Justin 相約 Kelly 去地踎食店撐枱腳,坐隔離枱的幾個大漢見到 Justin,夾硬迫他合照,辣㷫 Justin 爆 seed:「玩夠未呀!」大漢大聲夾惡一手推開 Justin,爆粗還拖:「你以為你真係『招積』呀?我當你生積咋!打交呀,同你隻揪吖!」嚇到呆晒的 Kelly 回魂後即上前向大漢 say sorry,更以身擋在男友面前護草,嘩!真係!好勇敢!
 
Kelly 這下愛的護身符,完全融化「招積」,此時此刻 Justin 拎出牧童笛吹奏,又擝埋唱k神器大唱五音不全破音版的《哪裡只得我共你》,Kelly 知道被成班人夾埋整蠱後,成大粒眼淚笑住流落嚟,仲大大力打落阿田手臂詐型:「好驚呀!」
 
事後 Kelly 喊住說:「我喊係因為首歌先喊,我哋啱啱一齊時好多阻礙,經歷好多嘢先一齊,就好似歌詞一樣。」Justin亦說,唱這首歌係因為歌詞好有 meaning:「我哋要面對傳媒同周圍嘅人嘅睇法,會有一個地方得我同你冇任何人騷擾,去孤島又好邊度都好,總之得我哋兩個一齊。」最後呢句先感動:「陳嘉莉,我係張建聲,你有咩困難,你交俾我啦,我喺你身邊,一直都喺度!」對住咁有膊頭、願意為自己解決所有難題的男人,Kelly 點唔冧吖!